Report Summary
Chaidh an sreath seo de dhuilleagan fiosrachaidh, a tha air an amas don phoball agus furasta a chleachdadh, a dheasachadh gus sealladh a thoirt air na buannachdan aig dòighean obair-phoileis ùra agus aig leasachaidhean a tha ri thighinn, na poileasaidhean a bhios gan riaghladh, agus dè tha seo a’ ciallachadh a thaobh chòraichean eiticeil, prìobhaideachd is daonna.
Duilleag Fiosrachaidh 4 - Naloxone
Cur-an-gnìomh is cleachdadh Naloxone le Poileas Alba
Thòisich Poileas Alba air oifigearan a thrèanadh sa Mhàrt 2021 agus theann sinn ris a’ chleachdadh pìolait sa Chèitean 2021. Rè na h-ùine pìolait 6-mìosan, bidh oifigearan san Eaglais Bhric, Dùn Dèagh is Glaschu an Ear a’ giùlan acainnean steallaire-sròine a thoirt do dhaoine a ghabh tar-dhòs aig àm cleachdadh dhrogaichean opioid, rud a dh’fhaodar comas a thoirt dhaibh air am beatha a shàbhaladh. Leigidh am pìolat seo le Poileas Alba measadh iomlan a dhèanamh air dè an tairbhe a dh’fhaodadh a bhith an lùib oifigearan sràide acainneachadh le Naloxone.
Thèid oifigearan oideachadh gus comharran tar-dhòis aithneachadh gu h-èifeachdach, agus an steallaire-sròine a thoirt do dh’fhulangaich. Bha grunn thuiteamasan soirbheachail ann bho thòisich an deuchainn a tha airidh air iomradh. Air Disathairne 27 Màrt 2021, thug constabal speisealta saor-thoileach à Poileas Alba dà dhòs dhen steallaire-sròine do chuideigin a bh’ air tuiteam na chlod ’s a bha fo amharas tar-dhòsaidh . Chaidh an t-euslainteach tar-dhòis a leigeil às an ospadal dà latha an dèidh sin.
Fhuair Comataidh Cùisean Albannach Taigh nan Cumantan fianais a bha a’ làn-dhearbhadh nach robh anns an dòigh-dhèiligidh an-dràsta, sa bheil drogaichean gam meas na chùis eucoir ach dòigh-dhèiligidh gu tur neo-thairbheach . Seach sin, mhol mòran dhaoine gum bu chòir Alba a bhith deònach fuasglaidhean innleachdach stèidhichte air fianais a chur an gnìomh airson dèiligidh ri mì-chleachdadh dhrogaichean.
A-rèir Fòram Dhrogaichean na h-Alba, tha staitistigs Riaghaltas na h-Alba ag ràdh gu bheil mu thuaiream 56,000 duine aig a bheil duilgheadas le drogaichean opiates (mar as trice, heroin) no benzodiazepines (drogaichean samhail valium) ann an Alba .
