Report Summary
Chaidh an sreath seo de dhuilleagan fiosrachaidh, a tha air an amas don phoball agus furasta a chleachdadh, a dheasachadh gus sealladh a thoirt air na buannachdan aig dòighean obair-phoileis ùra agus aig leasachaidhean a tha ri thighinn, na poileasaidhean a bhios gan riaghladh, agus dè tha seo a’ ciallachadh a thaobh chòraichean eiticeil, prìobhaideachd is daonna.
Duilleag Fiosrachaidh 2 - Sanas-peanais suidhichte rè a’ phandemic
Cleachdadh nan sanasan (FPN) le Poileas Alba rè a’ phandemic
Fhuair sgrùdaidhean beachd a’ phobaill rè a’ phandemic gun robh muinntir na h-Alba cha mhòr gu tur aontach leis na Riaghailtean ùra, gu h-àraidh aig àm a’ ghlasaidh thùsail.
Gus dèiligeadh ri feadhainn nach do ghèill ris na Riaghailtean, lean Poileas Alba dòigh-obrach nan ‘4Es’ (i.e. Conaltradh, Mìneachadh, Brosnachadh agus Co-èigneachadh) far an robh an ceathramh fear ag amas am bitheantas air càch a bhris na riaghailtean gu follaiseach no uair is uair.
Rè a’ chiad ghreis-ghlasaidh (23 Màrt 2020), chlàraich oifigearan poileis 44,296 eadar-ghabhailean leis a’ phoball gu h-iomlan, far nach robh sanas-peanais air a lìbhrigeadh ach ann an 7.2% dhiubh.
Ghrad-èirich cleachdadh shanasan-peanais leis a’ phoileas rè a’ chiad trì seachdainean dhen phandemic gu an àirde tràth sa Ghiblean, ach chrom iad mean air mhean an dèidh sin thar tìde mar a chithear sa chlàr gu h-ìosal.
Chunnacas grad-dhìreadh ann an cleachdadh shanasan-peanais leis a’ phoileas air làithean math grèine, saor-làithean poblach is deireadh-sheachdainean, agus nuair a bhite a’ foillseachadh lasachadh air na bacaidhean.
Chaidh 4,327 sanasan-peanais a lìbhrigeadh gu 3,786 daoine, rud a tha a’ riochdachadh nas lugha na 0.1% de shluagh na h-Alba.
A-rèir aithisg Comhairle nan Ceannardan Poileis Nàiseanta, chaidh sia càintean a lìbhrigeadh airson gach 10,000 duine an Alba ’s sa Chuimrigh rè an ama seo an coimeas ri trì do gach 10,000 an Sasainn. Gidheadh, bha luach trì uiread nas àirde sna càintean ann an Sasainn, rud a dh’fhaodadh a bhith air stairsneach co-dhùnaidhean nan oifigearan a mheudachadh.
